الخيمة العمانية

 

الخيمة العمانية




تابعنا على تويتر  يمكن للمراسلين إرسال بلاغات الأمطار والصور عبر رسائل الواتس اب للأخ أسطورة عمان على الرقم 95161936

العودة   منتدى الخيمة العُمانية >

~*¤ô§ô¤*~ || الخَيمَـة الإجتِمَاعِيَه وَ الأُسَـرِيَـة|| ~*¤ô§ô¤*~

> مملكة حواء و آدم

مملكة حواء و آدم حَـواء أنتِ الروح وَ الجَسدُ الآخَـر لِمملَـكه أنتِ مالِكُهَـا وَ آدَم سيدهـا..

إضافة رد

 
أدوات الموضوع انواع عرض الموضوع
قديم 2009-03-14, 02:08 PM   رقم المشاركة : 41
صدى الذكريات
أم سلطان
رئيسة قسم الخيمة الإجتماعية والأسرية - عضوة في لجنة المتابعة والتنفيذ
 
الصورة الرمزية صدى الذكريات
 


موقف محرج

هذا الموقف صار حال بنت اعرفها
كانت بالاعداديه وكانت مخطوبة لولد جيرانهم
عاد كل يوم البنت هذه وهي راجعه من المدرسة كان خطيبها ينتظرها عند بداية حارتهم ويضل واقف ويراقبها ألين توصل قرب بيتهم اونه عاد يطمئن إنها وصلت البيت بالسلامة اونه ..! وعاد هي تمشي بثقل ودلع وكانها ما موجود (ثقل لاه)

المهم
في يوم اغبر كان عند البنت حفله بالمدرسة اعتقد كان يوم المعلم وكانت هي مشتركة بالاحتفال فكانوا لابسين أزياء عمانيه

وهي كانت لابسه الزي الصوري أظاهر إن خطيبها عجبه اللبس عليها لما شافها لابسته وهي راجعه م المدرسه وعاد حب انه ياخرها توصل البيت

فايش سواااااااااااااااااااااا

افكاره غبره مثل افكار خطيبته

المهم
وهي قبل تروح البيت لازم توصل ربيعها للبيت ويدقوا شويه سوالف عند الباب ثم تكمل المسيره الى البيت

وانزين وهي عاد مودعه صديقتها وصديقتها تدخل البيت تسكر الباب والبنت عاد بتروح بيتهم الا عند لفه البيت شافت خطيبها واقف وجنبه كلب بيت الجيران الكلب متعود عليه آوته عاد الرجال قصده إنها بتخاف وبتوقف وعاد بتوسله بدلع انه يبعد الكلب من الطريق وهو عاد اونه بيرفض فرصه عشان يخلق حوار دلع بين خطيبين عاد طبعا هذا كان تخطيط الخطيب

ما يعرف انه اصلن خطيبتهم تخاف من الكلاب

هي اول ما شافت الخطيب طبعا عاد ابتسامه دلع ويوم سمعت الووووووووه الكلب ينبح نزلت عيونها الا تشوف الكلب واقف جنبه العيون طلعن برا واول ما الكلب قال الوووه الثانيه عاد الخطيب جاي يتكلم ما شاف غير
غباااااااااااار يدور هين خطيبته سارت وهي فررررررررررررررررررر الجبعه مال الصوري مستويه شراع وراها وذاك الدلع في المشي الي كان قبل شويه طار

لا تلع ولا شىء
وسيده بيت صديقتها الي توها مودعتنها لا ذوق ولا اتكيت سيده فتحت الباب وداخل الغرفه عند صديقتها وحيانها
الناس تنزقوا مو هناك مو مستوي ما متعودين من البنت هذا دخلو البيت بدون استئذان

لازقه بصديقتها ارجوش الكلب يعرفكم انتي وصليني عند اللفه ابا اسير البيت

وعاد الله يسامحه الخطيب ضحكته الين داخل بيت الجيران وهي تتوعد عليه

التوقيع


الف شكر على التوقيع المميز ابو الايهم

صدى الذكريات غير متواجد حالياً   رد مع اقتباس
قديم 2009-03-24, 01:09 PM   رقم المشاركة : 42
الوطن الوحيد
عضو شرف
 
الصورة الرمزية الوطن الوحيد
 


مرة اتذكر واحنا كنا صغار
كنت في صف ال ابتدائي كنت اروح مع عيال وبنات عمي والعايلة وسط النخيل في بلد نجلب الرقاط بيجي معنى الرقاط
كنا نذهب ونحمل اواني كثيرة لجمع التمور وبالعماني رقاط ـ هو الذي يسقط من التمر يؤخذ للحيوان لكي ياكله يعني ما يصلح للاكل البشري

وانا كنت شطور وشرير كنت اجمع خلسة التمور من السمة البساط ـ كان رجال شايب يجمعهم واذكر بعد لون مازره الازرق المخطط


اونه انا اليم من السمة وارجع البيت اول احد واجع الرقاط


واركض اول واحد

ومرة

لكن هندي اكتشف امري عندما علقت بالشبك


وبلغ عمي وعاد عمي حممممممم

رحمني وصاحت العصى بس ضربوني ما وااااجد


بس عاد ما حد يضحك بس تخيلو موقف كيف انا عالق متلبس

الوطن الوحيد غير متواجد حالياً   رد مع اقتباس
قديم 2009-04-16, 06:57 PM   رقم المشاركة : 43
فيصل البلوشي
عضو متميز جدا
 
الصورة الرمزية فيصل البلوشي
 



هاي حلوين ,’
(( كسر في ايدي :( )) ,

,

وانا صغير ما اعرف صف كم ,,
أول اعدادي او السادس او ثاني اعدادي , <<< ثبت على مكان واحد هلكتنا هع ,,


,’ مره في البيت ,’ ^^,’ جالسين الأهـل ,, في الغرفه ,’

وانا جالس فوق الطاوله ؛؛ ؛<<< مشي كراسي يعني


المهم ,’ وانا ,’ جالس ,’ واخوي الي اكبر منـي ,’ كان يريد شي من عندي ,’

وانا بطبعي من اعصب عنيد ما اعطي ؛؛؛ _<<< خوزوا عن الرعد العملاق هع ,

وانزـين ,, فهو شوي عصب

وانا جالس على حد الطاوله ,, كأني اصيد سمك هع

ولا يدفرني من فوق :(

آآآآآآآآآآآآآآآآآآي صرخه :(

طحت على ايدي وانكسفت :(

وانكرست :(

ودوني المستشفـى , سوو اشعه ,, قال الهندي كسر ,, وجذر خخخخ

المهم حولوني الى الرستاق ,, وسوولي جبس


بس انا بعدها فرحت ,,

شفت حماس تمشي وايدك ملفوفه ,, (( ملفوفه ولا خس ,هع ))

غباوه لاه

هع

وهذي الحتوته :(

وتشكرولي بالسلامه هههههههه


وسلامت راسكم الي كأنه يحه بارده منسايه في الثلاجه اسبوع ولونها قالب

هع ,’


تاشو

نعود في حلقه متهاكسه آخرـى

فيصل البلوشي غير متواجد حالياً   رد مع اقتباس
قديم 2009-04-17, 09:08 PM   رقم المشاركة : 44
فيصل البلوشي
عضو متميز جدا
 
الصورة الرمزية فيصل البلوشي
 


’,((سرقة أريج !! ))


, ^^,’أيام الطفولهـ,’

تعرفونـ العصـر ’لما ’, نروح الدكان ’ بالبلاد ,’ وحنا شالين المية بيسة في ايدنا وفاعصينها هع من المسكه ,, لين نوصـل الدكانـ ,,,
ونوصـل الدكان ’ ونشتري ’ ونتسوق ونطلع ,’ هع ,’

المهـم ’ ذاتـ عصيرات هع ,’

واذا بشاحنه مال الآيسكريم جايه للدكان ’,,ينزلو ^^ ,’ هع ,’
وحنـا في الدكان ,’ انا والربع ^^ نتشـرى قبل لا نروح الملعب ونلعب كوره هع ,
المهـم,’
وحنا طالعين من الدكان ,’واحد من الربع شاف باب الشاحنه من ورى مفتوح
ترى الهندي نزل ايسكريم للدكان وراح داخل يحاسب ومن يرجع يصكره ويتحرك,’
المهم ربيعنا ,’ دخل في الشاحنه ^^ ,هع والجو بارد كما وصفه لنا , هع ,’
وجاب اريج ^^ بالبرتقال ’وعند نزلته ,, قال واحد من الربع (( ايه انته مانريد مال برتقال هات مانجو )) وربيعنا الثور غبي رجع كأنه في بيتهم ,,هع وجاب مانجو ,’
وعاد يريد يقحم ((ينزل)) ولا الهندي طالع من الدكان ’,
,’
ويشبه ,, ركض وشال الأريج ’

وحنا ركضنا <<<<< شو دخلنا ّ!!! ,, هع بس كذا ركضنا هع ربيعنا لاه لازم نركض ,,

والهندي يركض ,, وراه ,, ولاكن ما لحقه مشكله الهندي دب شوي ,, وفيه كرش خخخخ,’

وجلس يتخرطم مانعرف شو يقول ,’ وربيعي طار بالأريج صوب الملعب

وحماس وحنا فرحانين ,’لعبنا كوره ,’ ومن خلصنا وزعناه هع ,,

مشروب طاقه لاه , ’

مجانين ,,

هع ,’

فيصل البلوشي غير متواجد حالياً   رد مع اقتباس
قديم 2009-04-18, 03:38 AM   رقم المشاركة : 45
فيصل البلوشي
عضو متميز جدا
 
الصورة الرمزية فيصل البلوشي
 



2 قوطي ديو !!



أيام الطفولهـ’ الساحرهـ ’ ^^ والذكرياتـ الجميله’ حيث للتهاكس ,’أقلام,’ تحب أن تنثر ما بداخلها ’ من ذكريات سواء مرحه او محزنه ,’
’,

’,

ايام الهنود يبيعون في الدكان’

في الحاره كان هندي أسمه بابوه ,,^^ << يبيع في الدكـان ,’
وهالهندي ,’ شوي ثور ^^مب وايد ,’ يعنـي ,’تقدر تسرقه هع ,
’,
المهـم ’

في يوم من الأيام ,’ جاه اتصال من بلاده ,’انه زوجته توفت ,, يعني ماتت
<<احلف ,, هع

مسكيـن ’, هو كان راجع قبل شهر من عندها ,’ :( << لحظه اصيح شوي هع
,’
يا حرام ,:( قضاء وقدر ,’
المهم ,’
بابوه , كل ماتدشعليه الدكان جالس في مكانه وايده ع خده وحزيـن عليها
تحصله كله سارح ويفكر بعيد
((اكيد يتذكر شعرها وريحتها ونقطة المكيف الي فراسها)) خخخ
,’
,’
بابوه حزين ^^ سارح ,, مايتحرك من مكانه ,, اذن ^^
فرصه مناسبه , للسرقه هع,’آ
,’
شو نسـوي,’ حنـا
نلبس دشداشه المغرب , من بعد الصلاه , نروح له ^^’, الدكان ,’
ربيعي يجلس يسولف معه , وانا اروح صوب الثلاجه ,,^^
أشل قوطين ديو !! ,, واحاسب عن ديو واحد ^^
كييييييييييييف ؟هع ,’
انا اخبركم ,’
طبعا الدشداشه فيها ردن , يعني وين ايدك ,,
اخش القوطي الأول ,,داخل ,وبعده القوطي الثاني ,’
يعني لما اروح صوبه بس اراويه قوطي واحد ,’ والثاني مخباي وراه هع
,واعطيه مية بيسه ^^
وبرع اعطي ربيعي البارد هع ,’ حماس
ونروح عند البحر ,’ وسوالف عن الفريق مال الحاره ((الكوره))

’,

وسلامتكم ,’,

:)




فيصل البلوشي غير متواجد حالياً   رد مع اقتباس
قديم 2009-04-18, 01:46 PM   رقم المشاركة : 46
فيصل البلوشي
عضو متميز جدا
 
الصورة الرمزية فيصل البلوشي
 


ماي مالح $$ ’, .’

اهـلاً بالجمـيع :) ’



,’

, أيام ’ الطفوله الباسمه ’
:)’
أيام المية بسيه ^ ^ ’,

:),

تعرفون’ مرات العصر نصنف انه مانلعب كوره ^ ^

نروح نحوط بالسياكل ,, ونخمس ,,ونتحـدى مال الحاره الي جنبـنا ,, خخخ ,’
والحلط ’ والآيل ,, اهم شي كان ^__^ هـع ,’

المهـم,’ تعرفون,’ بعـد ’, صلاة العصـر ,’ شوي شمس وحر ,’

وعاد ,’ حنـا ,’ نروح عند مطعم بالحاره ^^ نتجمع هناك ,’ لحـد تكتمـل الشله ^^ ,’ هـع ,’

’وعاد شوفو الغباء ,’ صيف وحر ,’ ولاه يشربو شاي ,’ ونغمس كباتي ,,

بدل عن نبرد على كبودنا ,, خخخخخ ,’ ^__^ ,,

حنا نجلس ’ برع المطعم علـى الطاوله ,’

والهنـدي ولا الف مره يطلع ,’ لنا ,’ ويتنازع ويحلف كل مره (( كسم بالله انا في خبر ماما مشان انته)) يقولنا ^__^ هع , ’وحنا’ نزيد ,’ ونطبل على الطاوله ,’ ومن البطره لاه ,’نكب شوي شاي في الطاوله ’
ماتخلص هالمية بيسة في خاطره يقول هههههه ,’

المهـم ’ واحنا ,’ جالسين عند المطعم ,’ ولا يجي ماي مالح ,’
تعرفون من ماي مالح ^__^ ,’ ,

هنــدي يسوق التنكر مال الماي (( زمان اول كانوا هنود يسوقوا))’

المهم ,’ جاء ماي مالح ’ ونزل من التنكر , وعاد شوي كرشه نازل تراه دبه ,’ وكل حين يرفعه ^^ ’,
ناقص يخلي حطبه تحت كرشه ,,بيصير مثل المكيف المرفوع بحطبه هع هع ,’
,’
المهم ,’ تـرى عند المطعم في نزله شوي اذا ما تسحب السايد تركض السياره ,’


صاحبنا ماي مالح ,’ الظاهر قايم من النوم العصر ومفتر راسه ولاحق على الشاي هع ,’
ونزل ونسى يرفع السايد ,’
,’
ولا هو يدخل المطعم ,’
ولا التنكر ,’ يمشي هع هع ’, ونصرخله ,’

وطلع ,ماي مالح ’ وقام يركض وراه ,’هههههههه
وعاد تخيلو يركض وكرشه يتخضخض,, هههه وماقادر ,
والزنوبه مسويه صوت حماس على الركض هههههه,’ وشال عليه صوبه ,’

وهناك ,’ خياط ’ ودعم التنكر ,, ههههههه,,

وحنا يابسين من الضحك ,’ والي ترقد على الطاوله من الضحك ’, والي جلس على الارض

؛؛<<< نذاله فيهم ,, خخخخخ,’

المهم ,’ تعور التنكر شوي , هع ,’


وسبب التسميه ماي مالح ^__^ , لانه يمر في الحاره نصرخله ماي مالح ماي مالح ,وهو يعصب
وطبق الأسم عليه ,,, هع هع هع ,’ ^__^ ,


وبـــــــث ^_&,
مع الثلامه
الى ذكـرى اخرى


فيصل البلوشي غير متواجد حالياً   رد مع اقتباس
قديم 2009-04-19, 01:51 PM   رقم المشاركة : 47
صدى الذكريات
أم سلطان
رئيسة قسم الخيمة الإجتماعية والأسرية - عضوة في لجنة المتابعة والتنفيذ
 
الصورة الرمزية صدى الذكريات
 


حكايات الرعب

من ذكريات الطفولة فلم زونبي (اموات تطلع من القبور ) فلم شفناه انا واخواني وضل هذا الفلم مسوي رعب كبير في قلوبنا نخاف نطلع بالليل عن يجينا الزونبي

المهم
عندي اخي اصغر مني عنده طبع غريب طبعه يمشي باليل وما يمشي كذا عادي لا وهو نايم تلاقوه يشيل البطانيه على ظهره ويمشي تقول حمالي
ومرات يقوم من النوم ويجلس يحسب على اصابعه ويتكلم (ما اعرف شو مشكلته)
كم موقف انحطينا فيه في حاله رعب بسبته وكم موقف ضحكنا فيه عليه لما كان يعمل هذه الحركه ونكون صاحين نقوم نشيل شراشف ونحطه عليه زياده وهو يمشي يلف على الغرفه دائره ويرجع ينام سالفه هذا الولد

مره من المرات كنت سهرانه باليل بروحي ما جايني نوم جالسه أتأمل السكون اونه مستانسه بروحي بالغرفه اختي الي تنام معي كانت رايحه بيت اختي المتزوجه وعاد وانا على فراشي اتفرج على الجدار والساعه المعلقه والغرفه ضلام وهذه الغرفه بيها بابين باب يطل على الصاله وباب يوصل لغرفه ثانيه الي فيها اخواني ونفس الشىء غرفه اخواني بها باب ثاني يوصل الى ممر يوصل للصاله (بيت جحا حشا ) هذه بيوت أول مو نسوي

المهم
وأنا في ذاك الحاله من التامل والسكون والسكينه وجالسه أتشوف على النجوم وضوء القمر مطل من الدريشه كنت فاتحه الستارة حتى ما يكون ظلام كثير بالغرفة يعني ضوء القمر ينور الغرفه

عاد وانا بهذه الحاله الا ما ادرى واعلم غير باب الغرفه الي يوصل للصاله ينفتح على مصرعيه واشوف حد واقف ومتحلف بالبرنوص كامل تخيلوا الموقف شعر راسي وقف من الخوف وعيوني ما عرفت اسكرها ولا افتحها كل ما بغيت اغمض تنفتح زياده ويوم افتحها تضل رموشي ترفرف من الخوف طبعا انتواعارفين من الي واقف هذا الله يسلمكم اخوي اظاهر قام من غرفتهم وسار للمر وجي الى الصاله فتح باب الغرفه الي انا فيها ودخل ماشىء سيده الى غرفتهم الى فراشه ونام

هو سوى هذا الحركه بس انا في ذاك الوقت تجمدت ما عبالي انه اخوي عبالي زونبي طلع لي
عاد هوي يمشي وانا في مكاني متجمده متيبسه تقولوا محنطه من الخوف واشوف هذا الشىء الي متلحف من راسه الى ساسه ويمشي بالغرفه ويدخل الى الغرفه الثانيه

عاد الله يسلمكم نسيت التامل ونسيت القمر واحيدني متيبسه مكاني وما دريت الا الصبح اعتقد انه اغمي علي

عاد اليوم الثاني عدت الاحداث في بالي وعرفت انه اخوي لكن ما قصرت فيه من التدبيج (بكس على ظهره) ليش سوى لي رعب بالليل وهو ما عنده خبر شو عامل

بخبركم سوالف ثانيه سببها لنا اخوي هذا وغيرها عن قصص الرعب ايام الطفوله بس ما الحين مره ثانيه

التوقيع


الف شكر على التوقيع المميز ابو الايهم

صدى الذكريات غير متواجد حالياً   رد مع اقتباس
قديم 2009-04-20, 10:34 AM   رقم المشاركة : 48
صدى الذكريات
أم سلطان
رئيسة قسم الخيمة الإجتماعية والأسرية - عضوة في لجنة المتابعة والتنفيذ
 
الصورة الرمزية صدى الذكريات
 


تسلموا هكسوس وحلوتنا على المتابعه المستره للموضوع


تعاااااااااااااااالو نكمل لكم سوالف اخوي

تابع حكايات الرعب

مره من المرات كنا جالسين انا واخواني سهرانين باليل ايام الاجازه الصيفيه نلعب اونوا طبعا ما تحلى اللعبه الا لما يناموا الكبار عشان نسهر على كيفنا يعني كان الوقت متاخر

انزين وكنا مندمجين في اللعبه واخوي هذا كان نايم جنبنا على فراشه

فجئه واحنا مندمجين في اللعبه جالسين الا يقوم من نومه يجلس والبطانيه فوقه وما نشوف الا يده طالعه ياشر كانه شايف شىء ويصرخ زونبي زونبي الضاهر الولد كان يحلم عاد ما نقى يحلم الا بالزونبي

نحن من سمعنا زونبي ما نصد على وين ماشر عن بس نشوف زونبي كلنا تحت البطانيه انخشينا وسكوووووووووووووت ولا نفس الى الصبااااااااااح


موقف اخر اخوي الكبير كان يدرس برا وجاي في الصيف وكان ينام في المجلس والمجلس مستقل عن البيت وتم فتره يسمع اصوات باليل عاد قال حال امي الله يرحمها انا اسمع اصوات بالليل ابا اشيل فلان ينام معي عاد من اختار هو اختار اخوي هذا الي يقوم بالليل اضاهر سفره للدراسه نسى طبع اخوي

اليوم الثاني الصباح نشوفه معصب يصرخ ويتكلم مع امي هذا ما اباه انا ينام معاي مره الثانيه ونسمع امي تقوله مو سوى ليش تنازعه
عاد هو يحكي
يقول كنت سهران اشوف تلفزيون وكنت اسمع هذيك الاصوات الي اسمعها مره صوت سنوره عند الباب ومره اسمع شىء يمشي ومره حركات ويقول جالس اصبر عمري واقوي عمري اني ما وحدي في الغرفه
وانا في هذه الحاله
الا اشوف هذا ولدش (يقصد اخوي الصغير) يقوم ويجلس جلوس ويعد اصابعه عاد وحده ضلام واصوات وهو جالسه يعد مره يعد اصابع يده ومره اصابع رجوله وانا اقوله فلان مالك شايف شىء ما يتكلم نشف دمي زياده

التوقيع


الف شكر على التوقيع المميز ابو الايهم

صدى الذكريات غير متواجد حالياً   رد مع اقتباس
قديم 2009-05-25, 10:36 AM   رقم المشاركة : 49
الوطن الوحيد
عضو شرف
 
الصورة الرمزية الوطن الوحيد
 


ماما فاطمة

الكتابة
عن الذكريات هي الكتابة عن الشجن وعن الحلم وعن مرابع الصبى واحيانا عن الحزن
اشيباء مفقودة في ذاكرتك قد لا تعرفها
اشكر صدى الكريات التي منحتنا هذه الصفحة للكتابة عنها .
اتمنى لو كنت كاتبا وانا صغير ، يقال ان القاص لا ينسى طفولته ـ ومع اعتذاري لنفسي لاني انسى كثيرا مااخبركم به عن ماما فاطمة التي اتذكرها الآن بشء بسيط ولكن

الآن اعو ذاكرتي لمنزلنا القديم قرب السوق واتذكر يوما من الايام ... كنا نسكن بالقرب من جارة ايرانية
في منطقة الجبيل .
^^ ^^^ ^^^ ^^^^ ^^^^

ا

لمرأة الإيرانية كانت تجمعنا في حوش بيتها مع والادها

تطعمنا الحلاوة الجميلة وتقص لنا حكايات عن البنت التي غابت في جبال عندما لم تسمع كلام امها وتخبرنا عن قصة ..الأقزام السبعة او الثمانية ...
كيف خرجوا من الجبال
كيف كاونا يشاركون الطعام مع ماما فاطمة ـ وهو الإسم لتلك المرأة الكبيرة في السن كنت اجلس بالقرب منها كانت تدنيني ليدها العطوفة وتمسح بيدها علي ـ ذات يوم ذهبت لمنزل ماما فاطمة لم اجدها بحثت عنها كثيرا لم اجدها امي لزمت الصمت لم تخبرني عنا ابدا .

بعد وقت طويل عرفت عن ماما فاطمة انها استقرت في الشارقة وعندما ذهبت للإمارات مع ابن خالي وامي وصلنا لمنطقة قالت امي توقف هاتفت امراة هكذا سمعتها وذهبت لرؤية تلك المراة التي ادخلتنا بيتها مع ابنها الكبير

بعد ما دخلنا البيت اخبرتني امي عن المفاجئة قالت هؤلاء احفاد ماما فاطمة تذكر الوطن

بكيت فرحا قلت سأراها اذا كانت ماما فاطمة ليست موجودة لأنهلا رحلت بالسرطان الذي كان ينهش جسدها
كان صابرة لم تبح بالمرض رحلت فاطمة وابقت ذريتها هناك اخوانا لنا نزورهم
واطعمتنا من بيتها قالت لا تحرموا اولادي من البسكويت

رحمك الله ماما فاطمة

الوطن الوحيد غير متواجد حالياً   رد مع اقتباس
قديم 2009-05-31, 02:56 AM   رقم المشاركة : 50
كبرياء
عضو شرف
 
الصورة الرمزية كبرياء
 


آلخدمة آلفورية >> من دفتري لأختـي :)

الله يسلم حآلكم .. آليوم آبي آحكيلكم عن أختي آلصغيرة

كح

أخوي آلكبير دآيمآ يطرش خوآتي آلصغآر آلدكآن في وقت آلظهر

وآلشمس في كبد آلسمآء ، وآلأرض شديدة آلحرآرة !

آلطريف في آلموضوع ان أختي لمآ يطرشهآ تشتري له من آلدكآن

كآنت مآ تلبس نعآل مع ان آلأرض حآرة واهي عندهآ نعآل !

تدرووون ليــــش ؟ ^__^



7


7

عشآن تروح وترجع بسرعة هع ^__^

/

كآنت تفكر إنهآ كلمآ حرقتهآ آلأرض [ آلرمضآ ] كلمآ وصلت آلدكآن بسرعة

ورجعت آلبيت أسرع ! كح >> تفكير يهآآآل ^__^

طبعآ .. طول آلدرب وهي تستظل يآ إمآ فـ ظل عمود كهربآء وإلآ في ظل جدرآن بعض آلبيوت !

ذهآبآ وإيآبآ هع

>> تكسر آلخآطر ^__^

وبس :)

كبرياء غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع



الساعة الآن 09:19 AM


Powered by vBulletin® Copyright ©2000 - 2018, Jelsoft Enterprises Ltd. TranZ By Almuhajir
لا تتحمل الخيمة العمانية ولا إدارتها أية مسئولية عن أي موضوع يطرح في الشبكة